Nagbabasa ka ba ng libro?

Kung "oo" ang sagot mo, mapalad ka. Hindi lahat ng tao ay nabibigyan ng pagkakataon na makapagbasa. Maging mapagmatyag ka sa paligid. Wala kang magawa? Nagrereklamo ka dahil boring ang buhay mo? Magbasa basa ka kapatid! May kuwento ako sa inyo, sana maka-inspire.

Sa tatlong magkakapatid na babae sa pamilya ko, ako ang pangalawa. Dahil siguro nasa gitna ako kaya ako ang pinaka-insecure sa aming magkakapatid. Lumaki akong palaging inihahambing sa aking panganay na kapatid dahil isang taon lang ang agwat naming dalawa. Insecure ako sa paraan na hindi ako masaya sa hitsura ko, sa buhay ko, sa pagkatao ko. Ganun kalala ang problema ko sa sarili ko noon. Ni hindi ako halos humaharap sa mga tao, kahit sa mga kakilala ko.

Sa mga pagkakataong nasa ganun akong kalagayan, naging takbuhan ko ang mini library ng mommy ko sa silid nila. Nagkukulong ako palagi sa sulok na iyon. Ang sulok na iyon ang humubog sa bagong ako. Ang pinaka-una kong binuklat na libro ay tungkol sa mga bible stories. Dito ko nakilala si God. Nakilala ko si Moses, si Abraham, at si King David. Naging kaibigan ko sila. Nagsimula din akong magbasa ng Health and Home, isang lifestyle magazine na compiled as book. Madami akong natutunan sa librong ito. Hanggang sa lumawak na ang interes ko sa libro.

Napapansin ko din na unti-unti ng nabago ang pananaw ko sa buhay. Mas naging mature ako, naging masunurin sa magulang at mas natututong tanggapin ang mga pagkukulang ko. Hindi pa rin tuluyan nawala ang insecurity ko. Sa totoo lang kasi kulang ako sa ganda kung ihahambing sa dalawa kung kapatid. Doon ako nagumpisang magbasa ng mga beauty magazines, naging expert ako sa make-up, sa pag-aalaga sa sarili, sa katawan, at sa kalusugan. Naging marunong akong mangupit ng buhok, magtahi ng damit at magluto ng mga simpleng putaheng pang Pilipino. Naging top student ako sa klase dahil sa hilig ko sa pagbabasa. Naging magaling ako sa wikang English dahil sa pagbabasa. Grumadweyt akong may honor sa elementarya, highschool at college. Ngayon nasa law school na ako, buhay ko pa rin ang pagbabasa. Malaki ang natulong ng mini library na iyon sa pagkatao ko. Mas confident na ako sa hitsura ko, sa sarili ko, saka may takot ako sa Diyos at sa mga magulang ko, mas gusto ko na ang sarili ko ngayon, at ang pinaka-importante sa lahat, mas naiintindihan ko ang buhay dahil sa pagbabasa.

Ang pagbabasa ay hindi kailangang araw-araw. Magiging walang kuwenta din ang mga binabasa mo kung hindi mo ito naa-apply sa tunay na buhay. Magsaya ka. Gamitin ang mga natututunan sa pagbabasa sa tunay na buhay. Ibahagi sa iba ang natutunan mo. Huwag maging madamot sa mga kaalamang nakuha mo sa pagbabasa. Naway magbasa basa ka kapatid! Namaste!